علوم المطر

[غرتني الايام]

كيف توصف المطر وتنقل علومه ...


موضوعنا يتكلم عن كيف تنقل علوم المطر والخير بوصف يكون دقيق وفي محله

من اكثر الاشياء اللي تنتقد الشيبان في شباب هذه الايام هي جهلهم في بعض الاوصاف

والمصطلحات اللي استخدامها يعتبر في بعض الاحيان مامنه بد

ومنها كيف تنقل علوم المطر والحياء ؟ خاصه ان جيتهم من ديره بعيده او رحت عساس

او كشات راح تواجه السؤال التالي ::

وش وقع الارض وش علومها وش علوم المطر أرب الارض ممطوره خاصه اذا كانوا يتحرون الخير

وهنا لازم تكون ملم في بعض الاوصاف والمصطلحات اللي تعتبر مقياس... لانك ماهو

معقوله تقوله واجد او شوي لان الواجد

والشوي وصف عام ولا يشفي قلب النشاد واذا اللي يسأل شايب تلقاه أما يصد عنك والا يمكن

يقولك منت من اهل العلم ومراحك زي مجيك

نبدا في الاوصاف بالترتيب في مايخص المطر




اوله هو مصطلح * مابل الدمن * وتتبعها بقول من هالاقوال ماعند الله بزهيد او الله يجيب الخير

والمصطلح هذا يرمز الى ان المطر كان قليل لدرجة انه الله يكرمكم ما بل الدمنه

وينقال بطريقه هذي

والله مامن مطر يذكر رشه مابلت حتى الدمن وماعند الله بزهيد والله يجيب الخير ويرزق المسلمين


الثاني * دم الارض * وتتبعها بقول من هالاقوال ماعند الله بزهيد او الله يجيب الخير

والمقصود منه انه بل الارض حتى تساوى لونها وصار شيفة الارض دل انها مبلوله

وينقال بطريقه هذي

والله مامن مطر يذكر رشه دمت الارض وماعند الله بزهيد والله يجيب الخير ويرزق المسلمين


الثالث هو ::: * شد الوطي * وتتبعها بقول من هالاقوال ماعند الله بزهيد او الله يجيب الخير

وشد الوطي هو انه الارض مايظهر بياضها اذا وطيت سواء كانت وطيت ادمي او مطيه او غيره ولو حفرتها بتلقى ان الماء
يكون ماتعدى نص الكف هذا يقاله شد الوطي اما اذا تعدى له وصف ثاني

وينقال بطريقه هاذي

اللهم لك الحمد جانا رش طيب ولحقت شد الوطي وان طرح الله فيها البركه وجاها رجع وولي طيب بتحل بركتها

مقايس الحفر وهي للارض الدماث الرمليه اما الصخريه لها مصطلحات ثانيه

بعد هالمصطلحات يجي مقياس الحفر والواحد ان كانه داري انه بيوجه احد من ذا الشيبان لازم يتجهز له بالعلوم اللي تسره

ولازم تحفر وتشوف الحفر واذا زاد عن نص الكف او لحق الكف يذكره لهم

وينقال بطريقه ذي

جانا مطر زين وحفره لحق الكف او دونه شوي واذا امكن يعلمهم بحدود المطر .. وهم بيقولون حدوده وين وش دياره هنا يا

انه يقول كذا وكذا والا يقول والله ماعلمنا بحدوده ولا واجهنا المخبر ويخلص نفسه

وبعدين الحفر اللي اكثر من الكف هو ملتحم الذراع وهو الرسغ في المنطقه اللي يغيب فيها العظم

وينقال جانا مطر طيب وحفره ملتحم ذراع دونه او زود شوي والله يجيب الولي وترجع الارض


وعقبه حفر الى الكوع

وينقال كذا

المطر معاد عنه منشود جانا مطر طيب وحفره حول الكوع والله يطرح فيه البركه ويرجع الارض

وجملة ماعاد عنه منشود هي كنايه ان الخير جا ولاعاد تنشدون عن حفر ولا غيره في الامطار اللي بتجي عقبه لان الارض

بتنبت ولاهيب محتاجه الا اللي يقوي عود النبت وهذا اقل شي يكفيه وكل قطره بها حيا

الحفر اللي ازود من الكوع مبالغه ولا له داعي وضياعه من راعيه <---------- شايب يوم سمع ولده يقول يبه الحفر مترين

وصف السيل في الارض الرمليه

سالت وانقعت الارض والمقصود هنا مهيب مواطي الارض لا تخربطون بينهم المقصود الارض المستويه تكون فيها نقع

يعني حار الماء والارض روت ... وملاحظه مهمه ترى اللي بيطالع المواطي والا النقع اللي حول الأزفلت بيكون علمه

مهوب دقيق الان الما يتجمع حول الزفلت لو ينزل ادناة الدون

ويقال في الوصف له وقياسه سيل اظهر روبة الارض

( من جريان الماء في الارص وفي روس الصياهد يطلع الرمل الناعم الابيض ويقلب الارض )

ويقال في اقوى درجاته فتق الجحور وشق روس الصياهد انه من قوتها هدم الجحور وسو مجاري ماء في المنحدرت من روس الصياهد

اما الارض العزاز والصخريه يقال حار الماء وزاعته الارض وامتلت الخباري وسالت الشعبان

ومن صعب وصف الارض الصخريه لانه صعب الحفر بس عين الخبير تعرف توصف لانها تغر الواحد



(( وجعل يسقى أذا جاء المطــــر..))

منقول

[عاشق الصحراء]

اللهم انزل علينا المطر

جهد رائع وموضوع مفيد

يعطيك العافية ونطمع في المزيد من المواضيع المفيدة

[الهجير]

بارك الله فيك

[جنون طفله]

دائما بين حروفك اجد روحا تتمزج بما بنا من وجدان
وشعور يخرج لنا بروعه البيان

ولكم تمنيت ان لا تنتهى بى الكلمات
فلا يسعنى غير قول الصمت فى حرم الجمال جمال
فدمت بكل تميز وابداع